Me ser på Melodi Grand Prix

for første gongen på mange, mange år, og det ser ut til å bli tysk seier. Det var jo ei veldig søt jente som song, då. Nå måtte eg opp og blogga litt, for å klara å halda planen om å skriva kvar dag i mai. Viss eg ikkje skundar meg nå, så kryssar eg datogrensa. Sidan Grand Prix-arrangementet var norsk i år, så fann me ut at me måtte ta litt del i feiringa. For å vera ærleg har eg alltid syntest at det er eit litt langdrygt og kjedeleg program, men i dag har eg faktisk kost meg med å sjå på. Enten så er det blitt eit betre program, eller så har eg forandra meg til det litt meir pop-kommersielle… Eg synest at dei norske programleiarane har gjort ein heiderleg innsats, og at pauseinnslaget med dans var humoristisk og flott.

I dag har det vore Jærdag, det vil seia ein slags marknadsdag i den vesle byen min. Veret var bortimot det mildaste me har hatt på denne sida av jul, og det var koseleg å rusla rundt i gatene og snakka med kjende medan me betrakta med eit halvt auge selgarar med mikrofon rundt halsen som selde spekepølser og poleringsmiddel. Til mi overrasking oppdaga eg at bror min var midtpunktet på eit show for det lokale helsestudioet, han sykla baklengs på ein spinningsykkel, tok armhevingar på den same sykkelen i takt med musikken, og hoia som ein amerikansk cheerleader i ståande posisjon frå sykkelstyret. Eg har ein sprek bror skjønar de. På ein bokhandel selde dei ut diktsamlingar til 30 kroner pr bok. Slikt kan eg bare ikkje stå i mot, så eg halte med meg ein nokså tung pose der i frå.

Me nådde og ein liten tur til Ikea. Kjøkkenprosjektet vårt sig sakte framover, nå har me bestemt oss for type kjøkken trur eg. Det blir kvite profilerte skap, og overskap med vindu i. Eg dregst meir mot det litt gammaldags romantiske enn high-tec og minimalisme. Benkplata blir av stein. Eg har kome så langt at eg gleder meg litt til å få nytt kjøkken, og det er ikkje verst til meg å vera. Eg er ikkje spesielt glad i å pussa opp hus, men eg innser at det trengst.

Så har eg handla endå fleire blomsterpotter i rosa, blått, grønt og stripete, og har kjøpt endå fleire blomar. Eg og Ingrid reiste ned til marknaden ein gong til på ettermiddagstid. Eg hadde sett eit område der dei hadde salgsboder frå ulike land og selde spesialitetar der i frå: Eg kjøpte eit stykke røykt fransk brie, til bortimot hundre kroner. Han smakte godt, men ganske kraftig, og så drakk me kaffi på Sunniva sin kafe.

Då eg ikkje fann bankkortet mitt i kassen på Kiwi tok eg det med relativt stor ro, det stikk seg ofte bort i lommeboka, men då det viste seg å bare ikkje vera der, vart eg passe varm i hovudet. Ingrid og eg klarte akkurat å skrapa saman pengar nok frå våre foreinte lommebøker til å betala for varene. Heldigvis så låg. bankkortet i ei anna veske, så alt er under kontroll.

På Ikea hanka eg med meg svensk gravlaks og sennepssaus, saman med eggerøre, spekeskinke og røykt fransk brie, vart det eit fantastisk Grand-prix måltid til inntak framfor fjernsynet og med friske bringebær til dessert. I dag smakte det utruleg godt med ein dag utan å gjera noko som helst som handla om jobb. Nå skal eg ned og sjå Tyskland hala seieren i land.

Heidi