16.mai om kvelden

Etter å ha gjort eit heiderleg dagsverk, med evalueringsmøte, mekking av årets bok laga av kunstfag og skapande skriving, medarbeidarsamtale med sjefen og ein intens innspurt med dramagruppa og «Den store fargeslukaren», er eg ør og sliten og skal nyta å ha eit par fridagar med fokus på å laga ei fin gebursdagsfeiring. Eg veit ikkje om det har noko med å ha blitt klissvåt i regnet fleire dagar på rad å gjera, men i dag har eg vore småfrossen og hatt litt vondt i halsen. Eg har skeia ut med ein pakke råmelkstablettar, sjølv om det sikkert er råmange karbohydrater i den slags. Her gjeld det å berga helsa, for det ville passa ekstra dårleg å bli sjuk nå.

Det er kvelden før den store dagen her i landet, men eg trur det ligg an til ei rolegare feiring av nasjonaldagen enn nokon gong her i heimen. Ungane er store, og ingen skal i veg for å gå i barnetog, ikkje har eg elevar ein gong å vinka å ropa til. Det er litt uvant, men akkurat nå i dag kjennest det litt deilig og, for eg har hatt det så travelt og har desse store prosjekta mine å planlegga, to store gebursdagsfeiringar og to teaterforestillingar og i tillegg vil eg gjerne laga ei fin familiefeiring for Sunnigull som blir 18. år. Vermeldingane er ikkje så gode, og det kjennest heilt ok å tenkja at eg faktisk kan velja å ta det litt med ro i morgontidleg viss eg kjenner for å gjera det. Ingrid er reist for å besøkja Oddvar i Porsgrunn, så me er barnevaktar for ein stk entusiastisk hund.

Kanskje eg bør klargjera Sunniva si bunad, sjølv om eg trur ho har planar om å vera heime og lesa delar av dagen, ho skal nemleg ha eksamen i teaterhistorie den 19. mai,- på 18-årsdagen sin, og sidan ho spelte teater i helga fekk ho ikkje lese så mykje då. Eg er klar til å hjelpa til så godt eg kan med å gjennomgå og strukturera fagstoffet. Teaterhistorie høyrest jo kjempeinteressant ut.

Dagen har vore fin, me kom mykje lenger enn sist med forestillinga, og boka me lagar blir kjempefin om eg torer å seia det sjølv. Nå må eg bare prøva å pleia halsen slik at eg held meg på beina… Katten kjem inn med fuktig pels og spaserer med våte potar over songane, som det skal lagast songhefte av til laurdag. Malande stikk ho hovudet sitt opp i halsgropa mi før ho legg seg langflat på skrivebordet i varmen frå lampen.
Heidi