Om tolv minutt

er Sunniva teknisk sett vaksen og myndig. Då er det bare eit «barn» att i huset, og det varer bare eit drøytt år så kryssar han den same grensa han og. Me har dekka bordet inne med kort og presangar og litt godt å eta slik me pleier å gjera det når ein av ungane fyller år. Ho rekk akkurat å opna pakkane før ho må i veg til toget for å koma tidsnok til eksamen i teaterhistorie. Måtte det gå bra. 18.årsdagen bør helst ikkje vera dagen for ein skikkeleg mislukka eksamen.

Nå er huset i ferd med å fyllast. I dag har eg henta Odd Christian på toget etter at han nesten mista ferga i Bergen fordi han hadde gløymt studentkortet heime og måtte snu. Ingrid har eg og henta på toget etter 17.-maituren til Porsgrunn.

Nå er det eksamenstider for alle ungdomane som høyrer til huset, og innimellom skal me legga til nokre skikkelege omgangar med gebursdagsfeiring. Det blir flotte greier det. I morgon etter eksamen har Sunniva bestillt familiemiddag med heimelaga kjøttkaker og grønn ertestuing. Håvard skal vera med heim til middag og om kvelden skal dei treffa venner. Grundigare feiring får venta litt.

Og eg får avrunda ein lang dag. I dag stod eg tidleg opp sjølv utan vekkerklokke for dagane er så korte for tida.

Heidi