Maikveldane

Så vakkert var solnedgangen på Orre på sundag. Me har hatt uvande mengder sol og fint, tørt ver denne våren. Om det er bekymringsverdig at det er slik let eg liggja i denne omgangen. At det er vakkert må me ha lov til å gleda oss over.

I dag hadde dei opprinneleg lova regn. Heldigvis ombestemte meterologane seg, og regnet kom i går. Det passa godt for oss som skulle vera i Sandtangen med elevane i ei aldersblanda leseløype heile dagen. Det vart fint. Eg hugsar framleis at me hadde ein aldersblanda aktivitetsdag då eg gjekk i sjette klasse og at eg og Rune Edland og kanskje Else var på ei gruppe der me hadde med oss yngre elevar. Det gjorde inntrykk, og frå min subjektive ståstad var det utruleg mykje kjekkare enn dei idrettsdagane me hadde hatt kvart år fram til då. Eg trur aldersblanda grupper er ein fin måte å dela inn på av og til. Dei eldste får litt ansvar, og kan visa omsorg, og alle blir litt kjende med kvarandre. Nokre synest nok det er litt skummelt å vera i lag med sånne dei ikkje kjenner, men eg såg at dei aller fleste gruppene finn ut av det på ein god måte.

Etter å ha gått frå post til post første halvparten av dagen, var det grilling og fri leik på sletta ved vatnet etterpå.

I dag hadde eg mine siste «vanlege» skrivetimar i kulturskulen. Eg må innrømma at det var litt vemodig. Me øvde til bokpresentasjon på Mølla onsdag om ei veke, og skreiv mosaikk tekstar. Til slutt avrunda me med ein leik og ein kroneis for å markera at epoken var over. Etterpå rydda eg ut av hylla der eg har hatt ordskål, blyantspissarar, blyantar og stearinlys liggjande. Eg hadde mykje å ordna, så det var seint før eg kom meg heim. Skriveåret i kulturskulen er ikkje heilt avslutta. Framleis gjenstår bokslepp kunstutstilling og opplesing og skrivetur til Stavanger.

Heidi