Dejlige København…

Sist helg var eg i København og forelska meg djupt og inderleg i byen. Me reiste saman, mest heile kollegiet på skulen der eg arbeidar, på personaltur. Eg med min flyskrekk har det alltid nokså ubehageleg før eg kjem meg i flyet. Eg funderer på å ta bussen heim frå flyplassen og sleppa unna heile greia. Denne gongen hadde eg hyra meg støttekontakt. For fleire månadar sidan bad eg Stig sitja i lag med meg for å trøysta og oppmuntra. Han er så flink med hysteriske elevar og andre som tapar fatninga. Eg bad om forståing for at me var i ein terapeutisk situasjon og haldt han i handa heile tida.

København var pynta til jul. Eg gløymde at eg er med i folkeaksjonen mot kommersiell julefeiring i oktober og november. Eg var trass alt i utlandet, og eg lot meg forsvarslaust forføra av all pynten og alle lysa.

Eg sov i dobbelseng med Thorbjørg, eg var på skulebesøk på to svært ulike danske skular, og eg tråla Strøget med Helen heile lørdagen. Eg såg “Phantom of the opera,” og bare lot meg blenda av den barokke scenografien og den vakre songen. På lørdagskvelden dansa eg på Copenhagens Jazzhouse, og etterpå vandra eg gatelangs seint på natta.

På sundag var det ny gatevandring og så kunstmuseum med Synneva . Ho gjekk der eine og aleine for å sjå Braque sin sitron, men den avdelinga viste seg å vera avstengd på grunn av opp-pussing. Men det me såg var vakkert. Me bestemte oss for å vandra kvar for oss for å kunna tenkja og å kunna sjå. Etterpå tok me drosje til tivoli der me møtte Stig og Jan Ivar.

I tivoli var det julemarknad og alt var opplyst av hundretusen små lykter. Det var som å kikka inn i ei eventyrbok for barn, og eg tillot meg bli eit barn. Eg kjøpte ei himmelblå julekule med kvite prikkar til juletreet og klarte å knusa ho då eg kom heim.

Vel heime har eg hatt ei travel veke. Eg har prøvd å henta inn att ein del av den forsømte søvnen og har lagt meg tidleg og lese Dea Trier Mørk. Ho har vore ei av yndlingsforfattarane mine sidan eg var 16 år, og nå
fekk eg kjøpt to av bøkene hennar på dansk i billegutgåve. Handlinga fann stad i København, og denne
gongen såg eg byen for meg. Eg lengtar ned att. Dette året har eg lagt bitar av hjartet mitt att to stader, ein bit på Iona og ein i København.

Heidi