Sundagen har landa.
Det er sundag og eg står opp.
Alle ting er nye.
På kjøkkenet mitt er det glitrande svarte benkplater av stein
og nye kvite skap
så merkeleg det er.
Eg set meg med tastaturet under fingrane.
Dikta kjem i lange rekkjer i dag.
Dei held einannan i hendene,
og eg smilar til dei.
Kakerøre av eggekviter og valnøter,
av sukker og knuste ritzkjeks.
Døtrene mine sit på dei nye kvite stolane
dei ser på meg som baker. Alt er så nytt,
Me har framleis ikkje knekt kodene til
steikjeomnen og microen.
Der står mor og far i kjøkendøra
dei har med rosa rosern.
Du kan dela buketten i to seier mor.
Ingrid skal hjelpa til,
for eg står jo og baker.
Vasen veltar med alt vatnet.
Og folk spring til
for å berga det nye kjøkkenet frå alt vatnet.
Dei ser på meg begge to,
mor mi og dotter mi
med same blikket på meg i midten.
Dokke gjer meg heilt nervøs seier eg,
og så prøver me å le.
Dei viser korleis eg kan legga lokket
for ikkje å søla kvit krem på den nye blanke plata.
Men eplekaka blir viss ikkje steikt.
har me då endå ikkje forstått denne nye steikeomnen?
Men så blir det kake med krem og bringebær
med druer, nektarin og kiwi
og eplekake med sukker og kanel
og krem i ei lita blå skål. Me får meir gjester.
Der kjem Anne Mette
akkurat på tida nok for kake.
Vepsane er innpåslitne på denne tida.
Anne Mette balanserer ein asjett med kake,
på den eine sida har ho katten,
på den andre ein augustveps.
Far min,
supermann utan fantomdrakt
prøver å fanga stikkeklare veps med bare fingrane.
Han er viss den siste mohikanar eller noko slikt.
Og så blir dagen ein samtale,
så fint å ha deg her, Anne Mette.
Sidan ho må rekka ein konfirmasjon om ei veke,
kan ho ikkje vera her så lenge.
Om eg bare unne finna brillene mine,
kunne eg sitja på til sentrum
for å sjå på forstilling ein gong til.
Eg vil jo sjå Vilde dansa,
og eg vil sjå mor hennar få tårer i auga fordi Vilde dansar,
det er noko eg plutseleg heilt bestemt ikkje vil gå glipp av,
dersom eg bare kunne finna brillene.
Har du gitt opp, spør Anne Mette
når det er fem minutt att til forstillinga.
Eg gjer ikkje opp før om to minutt, seier eg.
og der er dei jammen, i aller siste minutt.
Så syng me i bilen eg og Anne Mette,
bi på herren vær ved godt mot,
Jeg løfter mine øyne opp mot fjellene,
og alt er så fint,
og visst rekk eg forestillinga,
i siste augneblinken rekk eg ho,
der står Sunniva og sel brus,
for ho spelte forestilling i går,
og skal ikkje spela i dag.
Give me five seier ho, og det gjer eg.
Og Vilde dansar, dverg og apekatt,
krabbe og indianar,
og Irene er Ariel med vippande augnevipper
og med lang havfrueparykk.
I går var det Sunniva som dansa,
dei er så fine alle saman.
May Brit vil bli med og sjå på kjøkkenet,
og der står jammen Heidi og Per Inge i gangen heme.
Eg blir så glad fordi dei er her.
Ingrid har bakt rundstykke
og framleis er her att litt kake.
Eg må bare skunda meg litt
for eg skal i kyrkja og lesa dikt,
og så skal eg rigga til bønevandring,
Eg leitar fram ikonar
og det vesle krusifikset som Sofie laga til meg,
eg finn blanke ark
og krossen av krystall
som Odd Christian bar heim til meg i ryggsekken
frå saltgruva i Polen.
Han reiste rett etter 11.september
det året då 11.september brende seg inn i historia
og eg ville mest ikkje at han skulle reisa
til Polen i den store bussen
medan verda var av hengslene
men det er ein annan historie.
Eg halar med meg den store krukka etter bestemor,
som eigentleg ikkje er så veldig fin,
men som bestemor var glad i og eg nok aldri
kjem til å klara å kvitta meg med.
Nå skal ho vera bønekrukke med bøner frå folk til Gud,
og ho skal berast fram til alteret.
Kulepennar og fyrstikker må eg ta med meg,
ein stor spegel frå kjellarboda,
blomar frå hagen, vasar
og tre av mor sine roser.
Og så må eg reisa.
Kom snart igjen det er så fint å ha dokke her,
seier eg til Heidi og Per Inge,
og så må eg springa.
Eg kjem ti minutt etter avtalt tid,
og det blir litt hektisk før roa senker seg i kyrkja.
Torunn står i døra og deler ut salmebøker,
men framleis har ingen kome.
Eg veit ikkje kva for eit av desse dikta eg skal lesa,
seier eg. Har du tid til å velja eit av dei?
Ho les fort gjennom og meiner det same som meg.
Så senkar freden seg,
og trompeten løfter oss til himmels
saman med orgelet.
Så heldig eg er som her ein plass å høyra heime i,
tenkjer eg,
eg har ei kyrkje å bu i.
Og eg les dei to dikta frå lesepulten
og det kjennest bra.
Dei er heilt nye seier eg til folk,
men eg tok sjansen på å lesa,
sjølv om eg kanskje kjem til å forandra dei.
Etterpå det godt å vera heime.
Eg har vondt i hovudet og vil legga meg.
Ingrid kjem opp med varm suppe.
Varm suppe med mais og bøner
og med små tacoskjell til å dryssa på toppen.
Så et eg suppa i det nye kjøkkenet mitt
i lag med den same gamle kjærasten.
Sundagen har landa.
Han vart god.
Melder Heidi frå føremiddagen etter. Ho leikar forfattar og eksperimenterer litt med formene.
Heidi
From → Barna mine, Bestemor og morfar., blomar, Gode venner., Kattar, Kjærasten min, Mat, Mor og far., Musikk, Poesi, Skriving, Tru
Jamen detta är då en trevlig form!
Det kanske inte är så väldigt annorlunda egentligen från hur du vanligtvis skriver – men man läser det nog med lite mer eftertanke.
Ja, dette er vel det dei kallar knekkpoesi. Det å brekka opp setnigar som mest likegodt kunne vore i vanleg prosaform var vanleg på 70-talet trur eg, og vekte ein viss forakt blant betrevitarar. Men eg synest denne forma er litt sjarmerande.
Heidisk og veldig bra!! Gler meg til å nyta det nye kjøkenet dykkar:)
Ja, du må snart koma ein tur og nyta.