Grønt

Så går me mot utgangen av mai nok ein gong. Og endå eit år har eg dokumentert dagane denne grøne månaden slik eg har gjort det i ganske mange år på bloggen min. Det er så grønt ute, og det er så mykje som kjennest intenst og mjukt og sårbart akkurat i mai. Eg har alltid hatt ein eigen kjærleik for denne månaden. Nå ståår me på brua mellom vår og sommar, og i morgon kan me erklæra sommaren for opna. Eg veit at med sommaren kjem dei romslege og rolege dagane sånn etterkvart, så får me heller stå på litt ekstra nå i overgangsfasen. Mai er preludiet til juni, juli, august og september som og er månadar eg er spesielt glad i.

For eit par år sidan høyrde eg songen eg har lagt inn her på radioen. Eg kunne ikkje hugsa at eg hadde høyrt om Barbro Hörberg før, men eg vart heilt trollbunden av både tekst og melodi, og måtte skriva ned tittelen på songen for å sjå om eg kunne finna han på nettet. Av og til set nokon tekst og melodi på det eg tenker og kjenner og slik kjendest det med denne teksten. I dag skal han få vera sommarhelsinga frå meg til alle som har lese maibloggen min.

Eg kjem utan tvil til å skriva her i juni og, men då har eg ikkje lenger ambisjonar om å skriva kvar einaste dag.

Heidi