Sommarvise frå Stavanger

Sommarvise

Det er sommar i Stavanger, høyr det summar, syng og sviv,
ja sjå tett i tett på torget er det hundar, barn og liv.
Alexander Kielland står der, med den store frakken på,
og den måken oppå hatten hans har nok å kikka på.
Sola lyser over plassen, høyr, der var det ein som lo,
og ei oldemor med stokk har fått seg rosa joggesko.

Glade ungar spring og dansar, gamle damer slikkar is,
her er tatoverte armar, her er kropp på mange vis,
her er dei som syng på gata og som spelar på gitar,
her er dei som kjøpar Asfalt, der står mor og kyssar far.
Her er blomar her er bier, her er magar som skal gro,
midt på torget nynnar ho som har fått rosa joggesko.

Sjå eit mannskor syng i gata, mellom barnevogn og hund,
her er han som ligg på benken, han som treng ei fredastund.
Måken spreier sine venger, flaksar ned frå Kiellands hatt,
skrik mot ho som sit og geispar, for det vart litt seint i natt.
Her er liv og her er leven, Kielland lengtar etter ro,
men på torget dansar oldemor med rosa joggesko.

Heidi