Innelåst på enecelle

I dag var det dagen for å dra til Ålborg.

Eg og mor og far fann oss ein fortauskafe, og det var me ikkje aleine  om.

Dagens særaste aktivitet var eit besøk i eit escaperom. Odd Christian hadde vore med på det før og klarte å overalt oss alle, inkludert mor si til å bli med. Me hadde delt oss i to lag og kvart lag skulle låsast inne i eit rom i ein time. I løpet av denne tida skulle me prøva å løysa eit mysterium ved hjelp av hint, oppgåver, kodar og logikk.

Eg var på lag med Sunniva og Leif. Me tre vart låste inne på det romet som døra på biletet fører inn til, anstalten. Det første som skjedde der inne var at eg vart låst inne på ei lita mørk enecelle med ei madrass og ei bøtte på golvet. I bøtta låg ei lommelykt og når eg lyste mot veggane dukka det opp koder i ultrafiolett lys. Desse kodane måtte dei to på utsida bruka til å få opna ein kodelås for å få meg ut av romet. Då eg kom ut til dei andre måtte me finna hint i romet som gav oss nøklane til små skrin til puslespelbitar og rebusar.

Me klarte å løysa gåta og finna dei rette svara på ca førtifem minutt, og det andre laget kom seg ut dei og før det var for seint.

Eg har fått med meg at slike rom er ein trend i tida. Eg har syntest at det høyrest veldig rart ut og i tillegg litt klaustrofobisk og skummelt. Eg sit att med kjensla at dette var mykje kjekkare enn eg trudde. Det var leik og improvisering og teambuilding på same tida, og me var glade og gira etter at me hadde fått til å løysa oppgåva saman…